Prizren, 06 gusht
Rreth orës 14:15 minuta në rrugën “Sheh Emini” në Prizren, përball marketit “Abi Plus” pas një mosmarrëveshje në mes të dy personave ku janë shkëmbyer goditje që kanë shkaktuar lëndime ka ardhur deri te përdorimi i armës së zjarrit. Më pas i dyshuari ka ikur në drejtim të panjohur. Pas pranimit të informacionit për ngjarjen, policia e Prizrenit ka kryer hetime dhe e ka arrestuar të dyshuarin i cili është intervistuar në prani të avokatit mbrojtës. Gjatë intervistës i dyshuari i ka treguar policisë për vendin ku e kishte fshehur pistoletën. Arma e sekuestruar është e llojit revolver “Smith&Wesson” e kalibrit të panjohur me pesë fishekë. Pasi është informuar prokurori i shtetit i njëjti ka nënshkruar vendimin për ndalimin e të dyshuarit për 48 orë. Ndërkaq një rast tjetër ka ndodhur rreth orës 19:00 në rrugën “Carraleva”. Sipas informacioneve fillestare që janë siguruar nga emergjenca ku kishte kërkuar ndihmë një qytetar, thuhet se i njëjti kishte fituar një plagë shpuese në këmbën e majtë nga plumbi përderisa po ecte rrugës. Më pas mjeket kanë nxjerr nga këmba e viktimës një predhë që besohet të jetë a kalibrit të vogël. Policia e Prizrenit ka iniciuar rastin ndërsa të dyshuar nuk ka. Drejtoria e Policisë për Rajonin e Prizrenit edhe një herë apelon tek të gjithë ata që posedojnë armë zjarri të mos i përdorin sepse ato vrasin njerëz të pa fajshëm. Në të kundërtën jemi të obliguar që të ndërmarrim të gjitha veprimet ligjore që të dyshuarit të sillen para drejtësisë.