Mitrovicë, 12 maj 2022

Në vazhdimësi të angazhimeve policore në ngritjen e masave të sigurisë në trafikun rrugor dhe me qëllim të vetëdijesimit, Drejtoria Rajonale e Policisë në Mitrovicën e Jugut, ka filluar së realizuari fushatë vetëdijesimi me moton “Java e sigurisë rrugore“, ku përmes kësaj fushate synohet të vetëdijesohen pjesëmarrësit në trafik në veçanti ngasësit.

Edhe pse veprimet policore në fushën preventive janë duke u zbatuar në përputhje me autorizimet dhe masat ligjore, përkundër këtyre është vlerësuar si e nevojshme dhe e domosdoshme veprimi alternativ ku policia për pjesëmarrësit në trafikun rrugor po shpërndanë fletushka me porosi vetëdijesimi/sensibilizimi për kujdes dhe respektim të rregullave të trafikut rrugor me fokus në fushat: Përdorimi i alkoolit, përdorimi i telefonit, tejkalimi në vijë të plotë, siguria e motoçiklistëve në trafik, siguria e fëmijëve gjatë ngasjes në ulësen e parë.

Në kuadër të kësaj fushate, pjesëmarrësve në trafik nga ana e zyrtarëve policor në teren do t’u shpërndahen një numër i konsiderueshme i fletushkave me mesazhe vetëdijesimi. Kjo fushatë do të vazhdoj edhe ditëve në vijim.

Realizimi i kësaj fushate edhe një herë dëshmon përkushtimin e vazhdueshëm të Policisë, për vetëdijesim/sensibilizim dhe ngritje të sigurisë në trafikun rrugor. Policia e Kosovës, apelon tek të gjithë pjesëmarrësit në trafikun rrugor që të kenë kujdes dhe t`iu përmbahen rregullave të përcaktuara me Ligjin për sigurinë në trafik.