Nga data 12 e deri më 23 shtator, zyrtarë të Policisë të Kosovës dhe agjencive të tjera në vend, morën pjesë në kursin për Hetimin e Devijimeve Kimike dhe Laboratorët Klandestinë të koordinuar nga ICITAP-i dhe të financuar nga Qeveria e SHBA-së. Trajnimi është realizuar nga agjentë specialë dhe një kimist nga Departamenti për Trajnime Ndërkombëtare nga Administrata për Luftë kundër Drogave që është mbajtur në Akademinë e Kosovës për Siguri Publike në Vushtrri.

Kursi i ndarë në blloqe me trajnimin dyjavor, edukoi pjesëmarrësit për identifikimin e trendeve për devijimet kimike/prekursorëve, hetimin e kompanive kimike, përdorimin e pajisjeve për mbrojtje personale, zbutjen e kërcënimit dhe rrezikut në vendin e ngjarjes, mbledhjen dhe përpunimin e provave nga laboratorët e rrezikshëm klandestinë.

Pas përfundimit të trajnimit, pjesëmarrësit u certifikuan për të punuar në mjedise të rrezikshme dhe për t’i zbatuar protokollet shëndetësore dhe të sigurisë. Instruktorët e DEA-së dhe pjesëmarrësit e vlerësuan kursin si një hap të madh përpara në aftësinë e Kosovës për të hetuar në mënyrë të sigurt laboratorët e rrezikshëm klandestinë të drogës. Ushtruesi i detyrës së drejtorit të përgjithshëm të PK-së dhe atasheu i ICITAP-it në Kosovë dhanë fjalët hyrëse dhe mbyllëse, duke përfshirë edhe dorëzimin e certifikatave për studentët.

Në fjalën e tij, ushtruesi i detyrës së drejtorit të përgjithshëm të PK-së, z. Hoti, shprehu mirënjohjen e tij për mbështetjen dhe ndihmën nga ICITAP-i dhe DEA për ofrimin e trajnimit.