Ferizaj, 25 Prill 2025

Rreth orës 02:50, në rrugën “Besim Rexhepi” në Ferizaj, dy persona të maskuar, njëri prej tyre E.T. (16 vjeç) dhe tjetri rreth 13 vjeç, kanë hyrë fillimisht në shkollën teknike “Pjetër Bogdani”, duke depërtuar brenda përmes një dritareje. Pasi nuk kanë gjetur asgjë me vlerë, kanë vazhduar në shkollën “Tefik Çanga”, ku me forcë kanë hapur një dritare për të hyrë brenda.

Të dy kanë tentuar të hapin një nga zyrat e kësaj shkolle me një mjet pune, por pa sukses. Më pas, kanë depërtuar me forcë në kantinën e shkollës, ku është aktivizuar alarmi i sigurisë, duke i detyruar të largohen nga vendi i ngjarjes.

Në afërsi të “Tregut të Gjelbër”, i dyshuari E.T. është vërejtur nga sigurimi privat “Skifterat”, të cilët e kanë ndaluar dhe më pas kanë njoftuar policinë. Policia ka ndërhyrë menjëherë dhe ka arrestuar të dyshuarin, ndërsa i dyshuari tjetër është larguar në drejtim të panjohur.

Me vendim të prokurorit të shtetit nga Departamenti për të Mitur, është iniciuar rasti “Vjedhje e rëndë – e mbetur në tentativë”. I dyshuari E.T. është ndaluar për 24 orë për procedura të mëtejme hetimore.