Prishtinë, 24 tetor  2018 – Dje nga njësitet policore të Drejtorisë Rajonale të Policisë – Prishtinë ,  në pesë  raste të ndara  janë konfiskuar katër armë zjarri, një shkrepëse në formë të revoles, si dhe fishekë të llojeve dhe kalibrave të ndryshëm.

Armët e zjarrit janë gjetur dhe konfiskuar në katër automjete të ndryshme,  nga Njësiti i Reagimit të Shpejtë, që operon në kuadër të DRP- Prishtinë, gjatë një aksioni të kontrollit rutinë në  rrugën “Bajram Bahtiri” në Prishtinë.
Ndërsa një shkrepëse në formë të revoles është konfiskuar në oborrin e një shkolle në                  Fushë Kosovë.

Ndaj të gjithë personave të dyshuar, janë iniciuar rastet mbajtje në pronësi, në kontroll, në posedim ose në shfrytëzim të paautorizuar të armeve, dhe katër prej tyre pas intervistimit me urdhër të prokurorit të shtetit janë liruar në procedurë të rregullt, ndërsa njëri nga të dyshuarit është dërguar në qendrën e mbajtjes. 

Vetëm në nëntë mujorin e parë të vitit 2018, nga njësitet policore të Drejtorisë Rajonale të Policisë në Prishtinë janë konfiskuar 337 armë, 3229 municione të llojeve dhe kalibrave të ndryshëm, dhe janë iniciuar 292 raste Mbajtje në pronësi, në kontroll, në posedim ose në shfrytëzim të paautorizuar të armeve.