Pjesë e kësaj ceremonie ishin edhe eprorë të lartë të PK-së dhe familjarë të heronjve të Policisë së Kosovës që kanë rënë në krye të detyrës.

Këtë ceremoni, përveç pjesëmarrjes së mysafirëve, të cilët nderuan institucionin e PK-së me pjesëmarrjen e tyre, e karakterizoi edhe marshi dhe himni i Policisë së Kosovës, të cilat ekskluzivisht në këtë datë historike të 25 vjetorit u publikuan për herë të parë.

Me nga një fjalë rasti të pranishmëve gjatë kësaj ceremonie iu drejtuan presidentja e Republikës së Kosovës znj. Vjosa Osmani, kryeministri z. Albin Kurti, ministri i Punëve të Brendshme z. Xhelal Sfeqla dhe drejtori i Përgjithshëm i PK-së kolonel Gazmend Hoxha, të cilët gjatë fjalimeve të tyre kanë vlerësuar angazhimin e Policisë së Kosovës dhe gjithë pjesëtarëve të saj përgjatë gjithë kësaj periudhe kohore në ruajtjen e rendit publik dhe rendit Kushtetues, ofrimin e sigurisë ndaj qytetarëve, duke vazhduar më tej primatin si institucioni më i besueshëm dhe më transparent në Republikën e Kosovës.

Këtë ceremoni e madhështoi edhe trupa muzikore e organizuar nga Policia e Kosovës, të cilët interpretuan live himnin e PK-së, himnin shtetëror dhe marshin e PK-së, përfshirë interpretimin edhe të dy pikave artistike muzikore.

Gjatë kësaj ceremonie është prezantuar edhe dokumentari “25 vjet polici”, i cili është përgatitur enkas për këtë 25 vjetor.

Pas kësaj ceremonie në kampin Vrella, njësitë speciale elite të PK-së, përmes një ushtrimi kanë demonstruar shkathtësitë e tyre profesionale para pjesëmarrësve me rastin e këtij 25 vjetori, në të cilin morën pjesë edhe personalitetet e larta shtetërore.

Policia e Kosovës uron të gjithë qytetarët e Republikës së Kosovës dhe pjesëtarët e saj me rastin e 25 vjetorit të PK-së me sloganin “25 vjet shërbim me nder dhe dinjitet”.