Prishtinë, më 02 korrik 2021

Policia e Kosovës (PK) në vazhdën e angazhimeve të saja aktive në parandalimin dhe luftimin e veprave kriminale, konkretisht Drejtoria për Hetimin e trafikimit me Qenie Njerëzore (DHTQNJ), me qëllim të marrjes së masave proaktive dhe verifikimit të informatave në terren ka hartuar planin operativ për inspektimin e salloneve të masazheve, i cili është realizuar në bashkëpunim dhe mbështetje të inspektorëve komunal, inspektorëve të punës, zyrtarëve të ATK-se, inspektorëve të MINT-se dhe njësive tjera të profilizuar në kuadër te PK-së.

Plani operativ ,,Masazha-2021’’ i realizuar përgjatë këtij muaji në nivel vendi, ka rezultuar me arrestimin e gjashtë (6) personave të dyshuar mbi dyshimin e bazuar për përfshirje në veprat penale “Mundësim apo Detyrim në Prostitucion”, “Ofrim i Lokaleve për Prostitucion” dhe “Bashkëkryerje“.

Gjatë këtij operacioni policor, nën autorizimin e organeve të drejtësisë dhe në bashkëpunim me institucionet kompetente janë inspektuar pesëdhjetë e tri (53) lokale, prej tyre njëzë e nëntë (29) lokale janë mbyllur nga inspektorët komunal si dhe janë shqiptuar gjoba për mungesë të arkave fiskale, mungesa e dokumenteve të punës etj.

Nga zyrtarët policorë gjatë këtij operacioni janë legjitimuar njëqind e nëntëdhjetë e gjashtë (196) persona me shtetësi të ndryshme si, nga Shqipëria, Tajlanda, Italia, Greqia, Rumania, Serbia dhe Kosova, ku të gjithë shtetasit e huaj në mungesë të paraqitjes së lejes së punës dhe qëndrimit, sipas procedurave janë trajtuar nga Drejtoria për Migrim dhe Huaj si kompetencë e tyre lëndore.

Personat e dyshuar me vendim të prokurorit kompetent janë dërguar në mbajtje për dyzet e tetë (48) orë.

Policia e Kosovës gjithmonë do te jetë e angazhuar në parandalim të veprimtarive kriminale dhe në shërbim të ruajtjes së rendit dhe sigurisë në Republikën e Kosovës.